ఎప్పట్లాగే *

గంటలు రోజులౌతున్నాయి,

పూటలు మాసాలౌతున్నాయి,

ఋతువులు చక్రభ్రమణం చేస్తున్నాయి,

నేనలాగే ఉన్నాను, నువ్ కన్పిస్తావేమో అని

అక్కడే ఉన్నాను, మళ్ళీ చూడలేనేమో అని,

రైలుపట్టాలు పరిగెడ్తున్నాయి, పలకరించుకోకుండా,

గోరింక వర్ణ వైరుధ్యం పట్టించుకుంటుంది, చిలుక,

ఎండిన చెట్టు చూసి వెనక్కి మరలింది, వసంతం,

నేనందరినీ అడుగుతున్నాను, "నువ్వెక్కడని',

నన్నందరూ తరుముతున్నారు ,"నేనెవరని",,

అద్దం అడ్డంగా తలూపింది, నన్నో అపరిచితుణ్ణి చేసి,

రేపు బ్రతిమిలాడుతుంది తనలోకి రమ్మని,

గతం ఆటాడిస్తూంది, నీ ఆచూకీ ఇస్తా అని,

నేడు నవ్వుతుంది, ఇంకో పిచ్చోడు తయారవబోతున్నాడని,,

అందరి నోర్లు మూయించాను, నువ్వొక్కసారి కనపడగానే,

నా నోరే మూయించావు, ఎక్కడ బైటపడతానో అని,

నా ఊపిరాపింది, నీ ఊహించని మార్పు,

తప్పుకోమంటూ, తప్పలేదంటూ, జాలిగా నీ కళ్ళు,

తప్పు నాదే అనుకుంటూ, నీ చూపు తప్పించుకుంటూ, వేగంగా నా కాళ్ళు.........