నిషిధ్దాక్షరి

-మా లోకానిక్కొత్తా,

హా, నాకు నేనే మాలోకమన్పించేంత కొత్త,

-పూర్వాశ్రమం,

గుర్తుంటే ఇక్కడేంపన్నాకు,

-ఏం చేయగలవ్,

ప్రకృతికి పునసృష్టి చేయగల్ను,

-బ్రహ్మవా ,ఒక్కడు చాలు,

ఏ కాలానికైనా వెళ్ళి రాగల్ను,

-నీ కాలాన్ని వెతుక్కో ఫో,

మౌనాన్నీ, మాట్లాడించగల్ను,

-మానసికవైద్యుడివా, నీకే నీ అవసరమొచ్చేట్టుందే,

అభౌతికాల్నీ, అనంతాల్నీ కళ్ళక్కట్టగలను,

-మహేంద్ర జాలివా, ఏదీ, నన్ను మాయం చేయ్,

ఆశల ఊసుల్తో, కలల ఊహల్లోకి పంపగల్ను,

-అక్కడే ఉండకపోయావా, బ్రతకడానికేమొచ్చు,

"కవి"ని, "కావ్య కర్త"ని,

దబేల్మని మూసుకున్న ద్వారానికి,

వేళ్ళాడ్తోన్న "కవులకి ప్రవేశం లేదు" పతాకపు నీడలో,

నాలాంటి చాలా మంది, మనకొకడు పెరిగాడన్న ఆనందంలో,

"మరో లోకం వెతుక్కోక తప్పేట్టు లేదు".....