* నా లోకం *

నాదో లోకం, నాదలోకం,

మహాలోకం, కాదది మహీలోకం,

పలకరింపులో పది భావాలూ,

ప్రతీమాటలో మరో అర్ధమూ,

ఓదార్పుల్లో దాగని స్వార్ధం,

నవ్వుల వెనక దాగిన నిజాల

నిగ్గదీసే,

అదో లోకం, కాధదో లోకం,

మరోలోకం, చాలదు మరే లోకం,

నీలో నిన్ను తట్టి లేపే,

నిన్నలో రేపు గుట్టుచూపే,

మన్నులో మాతృత్వం గుర్తుచేసే,

మనుషుల్లో మనసుకి దిష్టి తీసే,

కర్మ లోకం, కారుణ్య లోకం,

నిన్ను నువ్ నిందించనవసరమే రాని,

బంధాల్ని కుంచించాలన్న తలపే రాని,

ఎవరి ఆలోచన్లకో బందీవయ్యే దౌర్బల్యం తాకనీని,

మేధలో అవలోకనాలెప్పటికీ ఆగనీని,

అద్భుత లోకం, అద్వైతపు లోకం....