"వి" "డు" "ద" "ల"

చలి చేతలకు ముడుచుకున్న

చెలి చేతులనందుకునే ఆనందంలో,

చీకటి చీర చుట్టిన రేయికి

వెలుగుల మాల మోసే ఆరాటంలో,

కళ్ళడిగే కలల కోర్కెలకి

కాలంతో జవాబిప్పించే ఆవేశంతో,

మనుషుల దూరాన్ని మరిపించే

మంత్రాక్షరానికై ఆరాధనతో,

ఉనికిని నమ్మని అందరికీ,

ఉన్నానని తెలియచెప్పే ఆలోచనతో,

కప్పేసిన వల్మీకాన్ని బద్దలు చేసుకుని,

కమ్మేసిన విలయాల భారం దించేసుకుని,

రెప్పవేయని కలత నిద్ర దూరం చేసుకుని,

రెమ్మ దాచిన సుమ సౌరభం శ్వాసలోనింపుకుని,

చెప్పలేని అవలోకనా స్రవంతుల్ని దరికి తీసుకుని,

చూడలేని గతాల గతాల దారికి తోసుకుని,

విడుదలయ్యాడు,

నాలోంచి నేను,

నిన్నలొంచి నేడు.....