*పోతే పోనీ*

పొనీ పొయేవాళ్ళని,

అర్ధించి గుండెల్లో దాచుకుంటే

మంటలు మిగిల్చేది నీ మనసే,

పోనీ వొద్దనుకున్నోళ్ళని,

పిలిచి ప్రేమగా ప్రాణం పెడితే,

ఎప్పటికైనా రగిలేది మానని గాయమే,

పోనీ నవ్వుకునే తోవల్ని,

స్నేహంగా చొరవుందని చొచ్చుకుపోతే

నవ్వులపాలయ్యేది నీ నవ్వే,

పోనీ నటించే నాలుకల్ని,

ఇష్టంగా మాటకలిపితే

భరించలేని మౌనం ముంచేది నీ నిన్నే,

ఎవరికెవరేమీ కాని లోకంలో,

ఎప్పటికప్పుడు తీరు మార్చే కాలంలో,

ఎవరోఒకరికై బ్రతకడం దండగ,

అన్నీ నీవైన, నీకు నువ్వండగా ఉండగా,

రక్తం చిందక రోగం ముదిరే మాయలో,

రాత్రులు చీల్చిన పగటి అవశేషాల విశేషాల్తో,

ఎవరూ ఎన్నడూ చూడని గెలుపుకై ఆటలెందుకు,

నిన్ను నువ్వే ఓడించుకుంటూ పద ముందుకు....